لورالائی (میاں محمد عامر بشیر آرائیں) ممبر صوبائی اسمبلی بلوچستان حاجی محمد خان طور اتمانخیل کی جانب سے میونسپل کمیٹی لورالائی کو شہری سہولیات کی بہتری، صفائی ستھرائی کے نظام کو جدید خطوط پر استوار کرنے اور نکاسی آب کے مسائل کے حل کے لیے جدید ہیوی ڈیوٹی مشینری فراہم کر دی گئی ہے۔ فراہم کی جانے والی مشینری میں ہیوی ڈیوٹی ایکسکویٹر، ڈمپر ٹرک اور ہیوی ڈیوٹی سکشن مشین ٹرک شامل ہیں۔
میونسپل کمیٹی لورالائی کے چیئرمین طاہر خان ناصر اور میونسپل کمیٹی کے عملے نے فراہم کردہ جدید مشینری وصول کی۔ اس موقع پر چیف آفیسر میونسپل کمیٹی لورالائی محب اللہ خان بلوچ نے بتایا کہ نئی مشینری کی فراہمی سے شہر میں صفائی ستھرائی، نالیوں کی صفائی، نکاسی آب اور دیگر بلدیاتی امور کی انجام دہی میں نمایاں مدد ملے گی۔
انہوں نے کہا کہ میونسپل کمیٹی لورالائی شہر کو صاف ستھرا، منظم اور شہریوں کے لیے بہتر ماحول فراہم کرنے کے لیے کوشاں ہے۔ جدید مشینری کی دستیابی سے بلدیاتی عملے کو اپنے فرائض کی انجام دہی میں سہولت حاصل ہوگی اور شہر کے مختلف علاقوں میں صفائی ستھرائی کے کام کو زیادہ مؤثر انداز میں آگے بڑھایا جا سکے گا۔
چیف آفیسر محب اللہ خان بلوچ کے مطابق ہیوی ڈیوٹی ایکسکویٹر مختلف ترقیاتی اور صفائی کے کاموں میں معاون ثابت ہوگا، جبکہ ڈمپر ٹرک کے ذریعے ملبہ اور دیگر فضلہ منتقل کرنے کی صلاحیت میں اضافہ ہوگا۔ اسی طرح ہیوی ڈیوٹی سکشن مشین ٹرک نالیوں اور سیوریج نظام کی صفائی اور نکاسی آب سے متعلق مسائل کے حل میں اہم کردار ادا کرے گا۔
انہوں نے کہا کہ شہری علاقوں میں صفائی ستھرائی کے نظام کو بہتر بنانے کے لیے جدید مشینری کے ساتھ ساتھ عملے کی محنت، مؤثر منصوبہ بندی اور مسلسل نگرانی بھی ضروری ہے۔ میونسپل کمیٹی دستیاب وسائل کو بروئے کار لاتے ہوئے شہر کے مختلف علاقوں میں صفائی کے انتظامات بہتر بنانے اور شہریوں کو درپیش بلدیاتی مسائل کے حل کے لیے اقدامات جاری رکھے گی۔
