یومِ سیاہ کشمیر، کشمیری عوام کی جدوجہدِ آزادی کو سلام پیش کرتے ہیں، سردار بابا غلام رسول عمرانی

باباکوٹ(رپورٹ محمد یونس عمرانی) صوبائی مشیر برائے محنت و افرادی قوت بلوچستان سردار بابا غلام رسول عمرانی نے 27 اکتوبر یومِ سیاہ کشمیر کے موقع پر کشمیری عوام کے ساتھ بھرپور اظہارِ یکجہتی کرتے ہوئے ان کی جدوجہدِ آزادی کو خراجِ تحسین پیش کیا ہے۔
انہوں نے کہا کہ 27 اکتوبر کا دن کشمیری عوام کی تاریخ کا ایک اہم اور افسوس ناک دن ہے، جب 1947 میں بھارتی افواج جموں و کشمیر میں داخل ہوئیں۔ اس دن کو کشمیری عوام اور پاکستانی قوم یومِ سیاہ کے طور پر مناتے ہیں اور مقبوضہ کشمیر کے عوام کے ساتھ اپنی غیر متزلزل حمایت کا اظہار کرتے ہیں۔سردار بابا غلام رسول عمرانی نے کہا کہ کشمیری عوام نے اپنے بنیادی حقوق، آزادی اور حقِ خودارادیت کے حصول کے لیے طویل جدوجہد کی ہے۔ ان کی قربانیاں تاریخ کا ایک اہم باب ہیں، جنہیں کبھی فراموش نہیں کیا جا سکتا۔ انہوں نے کہا کہ کشمیری عوام کی آواز کو دبایا نہیں جا سکتا اور ان کے جائز حقوق کی حمایت جاری رکھنا وقت کی اہم ضرورت ہے۔انہوں نے کہا کہ پاکستان کے عوام کشمیری بھائیوں اور بہنوں کے ساتھ کھڑے ہیں اور ان کی سیاسی، اخلاقی اور سفارتی حمایت جاری رکھیں گے۔ مسئلہ کشمیر کا منصفانہ اور پائیدار حل اقوام متحدہ کی متعلقہ قراردادوں اور کشمیری عوام کی امنگوں کے مطابق ہونا چاہیے تاکہ خطے میں دیرپا امن قائم ہو سکے۔انہوں نے عالمی برادری اور انسانی حقوق کی عالمی تنظیموں پر زور دیا کہ وہ مقبوضہ کشمیر کی صورتِ حال کا سنجیدگی سے نوٹس لیں اور کشمیری عوام کو ان کے بنیادی حقوق اور حقِ خودارادیت کی فراہمی کے لیے مؤثر کردار ادا کریں۔انہوں نے مزید کہا کہ یومِ سیاہ کشمیر ہمیں یہ پیغام دیتا ہے کہ مظلوم عوام کے حقوق کے لیے آواز بلند کرنا ہم سب کی مشترکہ ذمہ داری ہے۔ پاکستانی قوم کشمیری عوام کی جدوجہدِ آزادی اور ان کے جائز مطالبات کی حمایت جاری رکھے گی۔